Ætlaði í bifvélavirkjun en opnaði saumastofu

Abdikadir Mohamed er 22 ára og flutti til Hargeisa, höfuðborgar Sómalilands, í leit að betra lífi. Hann kom fótgangandi 500 km leið úr sveitinni  til að elta draum sinn að læra bifvélavirkjun. Námið var hins vegar ekki í boði í landinu og þá voru góð ráð dýr.

Abdikadir fékk enga vinnu og langvarandi atvinnuleysi blasti við honum þar til hann heyrði af atvinnueflingu unga fólksins á vegum SOS Barnaþorpanna. Hann sótti námskeið í frumkvöðlafræði og lærði til klæðskera sem reyndist liggja vel fyrir honum.

Sjáðu myndband frá heimsókn okkar á saumastofuna og með viðtali við Abdikadir.

Svo er ég nokkuð fær í þessu

Abdikadir er harðduglegur og opnaði saumastofu sem gengur ljómandi vel. Á þeim örfáu mínútum sem undirritaður ræddi við Abdikadir inni á saumastofunni í vettvangsheimsókn í mars sl. komu þrír viðskiptavinir.

„Ég vinn frá morgni til kvölds og það er mikið að gera. Viðskiptavinirnir eru ánægðir því ég stend við mitt og er tilbúinn með fötin á uppgefnum tíma. Svo er ég nokkuð fær í þessu þó ég segi sjálfur frá þannig að fólkið kemur aftur,“ segir Abdikadir sem hefur ráðið tvo aðstoðarmenn.

Hann sér þetta þó ekki fyrir sér sem framtíðarstarf heldur skref í þá átt að láta drauminn rætast, safna sér pening fyrir námi í bifvélavirkjun og opna svo verkstæði.

Viðtal og myndir: Hans Steinar Bjarnason

75% atvinnuleysi ungmenna

75% atvinnuleysi er meðal ungmenna undir þrítugu í Sómalíu þar sem ófriður hefur ríkt í mörg ár. Hryðjuverkahópar hafa lengi unnið gegn friði og öryggi og slíkir hópar reyna m.a. að höfða til atvinnulausra ungmenna.

Verkefnið The Next Economy, Atvinnuhjálp unga fólksins í Sómalíu og Sómalílandi, gengur út á að þjálfa ungt fólk svo það geti fengið vinnu eða stofnað eigin fyrirtæki. Verkefnið er fjármagnað af styrktaraðilum SOS á Íslandi og Utanríkisráðuneytinu.

Sjá líka:

Íslendingar hjálpa ungmennum í Sómalíu og Sómalílandi að fá vinnu

Hryðjuverkahópar ásælast atvinnulaus ungmenni

Ungmenni streyma á vinnumarkaðinn í Sómalíu og Sómalílandi