„Hryðjuverkamenn drápu alla karlmenn í þorpinu“

Síðastliðin ár hafa verið erfið í Diffa í Níger. Héraðið á landamæri við Nígeríu þar sem gríðarleg átök hafa verið að undanförnu og flóttafólk því streymt yfir landamærin. Alls hafa 150 þúsund manns flúið yfir til Níger, þar af 48% börn.

Fæðuöryggi var lítið í Diffa áður fyrr og er enn minna nú þar sem fólksfjöldi hefur aukist verulega. Talið er að um 156 þúsund manns í héraðinu lifi við mjög lítið fæðuöryggi og 23,5 % eru verulega vannærð.

Þar fyrir utan er tala munaðarlausra og yfirgefinna barna á svæðinu afar há og mikið er um andleg veikindi barna. Ástæðan fyrir því er meðal annars talin sú að fjöldi barna hefur upplifað áföll, til að mynda dauða foreldra og eyðileggingu heimila sinna.

„Ég flúði hingað til Diffa með börnin mín fimm,“ segir Isatu, nígerísk kona sem missti manninn sinn þegar ráðist var inn í þorpið þeirra í heimalandinu. „Hryðjuverkamenn drápu alla karlmenn í þorpinu, þar á meðal manninn minn.“

Isatu segir ástand fjölskyldunnar hafa verið afar slæmt þegar þau fyrst komu yfir landamærin. „Börnin mín voru mjög veikburða. En eftir að við fengum aðstoð hjá SOS Barnaþorpunum hefur ástandið batnað mikið“ en fjölskyldan hefur fengið neyðaraðstoð hjá samtökunum undanfarnar vikur. „Við vorum send á heilsugæsluna og börnin mín fengu viðeigandi aðstoð vegna vannæringar. Þá fara þau á barnvæna svæðið hjá SOS á hverjum degi þar sem þau fá menntun, sálfræðiaðstoð og geta leikið við önnur börn. Þeim líður mun betur nú heldur en áður,“ segir Isatu.

Á næstu mánuðum munu fjölskyldur í Diffa sem fá reglubundna neyðaraðstoð hjá SOS verða skjólstæðingar Fjölskyldueflingar á svæðinu. „Ég get ekki beðið eftir að komast inn í verkefnið. Ég ætla að fá aðstoð við að stofna lítið fyrirtæki og börnin mín fá að fara í skóla. Ég ætla að gera hlutina vel og verð sjálfstæð kona innan skamms. Nú horfum við bara fram á veginn!“ segir Isatu.