Yfirgefin strax eftir fæðingu – í Evrópu

Allt að 40 nýfædd börn eru yfirgefin á sjúkrahúsinu í Pristina í Kósovó á hverju ári. Þau voru ekki velkomin í þennan heim. Þegar börnin gráta fá þau pela og hjúkrunarfræðingarnir reyna að sinna þeim en hafa nóg annað að gera.

SOS Barnaþorpin í Kósovó eru einu samtökin sem hjálpa þessum yfirgefnu nýburum.
Börnin fá bráðabirgðaheimili hjá SOS-móður í barnaþorpi þar til yfirvöld hafa fundið hentuga og varanlega lausn fyrir hvert barn.

Flest eru börnin ættleidd innanlands, enda er langur biðlisti eftir ættleiðingum. En ættleiðingaferlið tekur langan tíma og fyrstu dagar ævinnar eru mikilvægir, svo börnin njóta góðs af því til frambúðar að fá umönnun SOS-móður.

Ef SOS Barnaþorpanna nyti ekki við myndu börnin verja fyrstu vikum og mánuðum ævi sinnar á sjúkrahúsi þar sem hinir og þessir starfsmenn reyna að mæta þörfum þeirra í ófjölskylduvænu umhverfi.

Vlora Jakupi er ein þessara SOS-mæðra sem sér nýfæddum börnum fyrir ást og umhyggju. „Börn hafa þörf fyrir hlýju og nálægð á hverjum einasta degi. Og þau þurfa að skynja að einhverjum þykir vænt um þau,“ segir Vlora.

Myndin er fengin frá SOS Barnaþorpunum í Danmörku.