Eva Ruza er nýr velgjörðasendiherra SOS Barnaþorpanna
Eva Ruza Miljevic er nýr velgjörðasendiherra SOS Barnaþorpanna og tók hún formlega við hlutverkinu í dag, þriðjudaginn 12. desember klukkan 12. Fyrir í hópi sendiherra SOS voru Eliza Reid, Hera Björk Þórhallsdóttir og Rúrik Gíslason og bætist Eva í þennan glæsilega hóp.
„Eva Ruza er fjölhæfur og landsþekktur skemmtikraftur, eiginkona og tveggja barna móðir sem endurspeglar gildi SOS Barnaþorpanna um mikilvægi þess að ala börn upp í kærleiksríkri fjölskyldu. Hún kemur úr stórri og samheldinni fjölskyldu sem öll styrkir börn hjá SOS Barnaþorpunum,“ segir Hans Steinar Bjarnason, upplýsingafulltrúi SOS.
Ragnar Schram, framkvæmdastjóri SOS á Íslandi, og Eva Ruza.
„Það er sannur heiður að taka við þessari útnefningu og því sem felst í því að vera velgjörðarsendiherra SOS Barnaþorpanna. Ég hef í mörg ár verið SOS-foreldri og á nú tvö börn úti í heimi sem eiga fallegt líf í SOS barnaþorpinu sínu, og því stendur þessi titill nálægt hjarta mínu. Ég hlakka til að halda áfram að deila þessu fallega starfi sem SOS Barnaþorpin vinna og vona að flestir taki eftir,“ sagði Eva við þetta tilefni þegar hún tók formlega við hlutverki sínu sem velgjörðasendiherra SOS.
Hera Björk hefur verið velgjörðasendiherra lengst eða síðan 2009, Eliza síðan 2016 og Rúrik síðan 2018.
Þakkir til Vilborgar Örnu
Um leið og við bjóðum Evu Ruzu velkomna í hópinn viljum við færa Vilborgu Örnu Gissurardóttur okkar einlægustu þakkir fyrir hennar framlag sem velgjörðasendiherra SOS. Við hjá SOS Barnaþorpunum erum stolt og þakklát Vilborgu fyrir þetta góða samstarf sem við áttum í slétt tíu ár eða síðan í lok árs 2013.
Velgjörðasendiherrar SOS starfa að sjálfsögðu í sjálfboðavinnu. Þeir komu allir saman í dag og við tilefnið færðum við þeim lítinn þakklætisvott fyrir óeigingjarnt starf í þágu SOS.
SOS Children´s Villages eru stærstu óháðu hjálparsamtök heims sem einblína á börn án foreldraumsjár og ósjálfbjarga barnafjölskyldur. Samtökin hafa einnig frá stofnun árið 1949 sinnt almennu mannúðarstarfi, svo sem neyðar-, þróunaraðstoð og umbótaverkefnum, allt í þágu barna og velferðar þeirra.
Myndir: Friðrik Páll Schram
Nýlegar fréttir
Ingibjörg og Anna Bjarney kjörnar í stjórn SOS
Aðalfundur SOS Barnaþorpanna á Íslandi var haldinn mánudaginn 13. maí og urðu þá breytingar á stjórn samtakanna. Ingibjörg E. Garðarsdóttir og Anna Bjarney Sigurðardóttir voru kjörnar í stjórnina til ...
SOS eru einu samtökin eftir á Gaza sem taka að sér fylgdarlaus börn
Ástandið á Gaza er sérstaklega viðkvæmt núna og SOS Barnaþorpin eru einu hjálparsamtökin eftir á svæðinu sem taka að sér fylgdarlaus börn. Þessi frétt er uppfærð reglulega með nýjustu fréttum frá SOS ...