Guðrún prjónaði 60 pör af lopavettlingum fyrir börn í Rúmeníu
Í SOS barnaþorpinu í Hemeius í Rúmeníu og nágrenni þess klæðast börn íslenskum lopaklæðnaði í vetur. Á dögunum kom sending til barnaþorpsins frá Íslandi sem í voru m.a. 60 pör af lopavettlingum sem Húsvíkingurinn Guðrún Kristinsdóttir handprjónaði og gaf börnunum. Börnin voru spennt fyrir gjöfinni frá Íslandi eins og sjá má í meðfylgjandi myndbandi.
Vettlingar, sokkar og húfur
Margir muna eftir Guðrúnu síðan hún komst í fréttir RÚV undir lok árs 2019 eftir að hafa handprjónað 57 lopapeysur á börn og starfsfólk barnaþorpsins. Guðrún ákvað fyrst að prjóna eina lopapeysu fyrir styrktardóttur sína í barnaþorpinu en vildi svo ekki skilja hin börnin útundan, og heldur ekki starfsfólkið, og ákvað hún því að prjóna peysur á alla.
Sjá líka: Guðrún prjónaði 57 lopapeysur fyrir barnaþorp
Sjá líka: Lopapeysurnar afhentar í Rúmeníu
Guðrún notaði afgangslopann eftir peysurnar og prjónaði vettlingana sem hún kom til okkar á skrifstofu SOS í Hamraborg í Kópavogi. Þar voru fyrir, sokkar og húfur úr lopa sem annar styrktaraðili hafði fært samtökunum að gjöf og var allur lopaklæðnaðurinn sendur í barnaþorpið þar sem hugsað er til Guðrúnar af hlýju.
Líka barnafjölskyldur
Vettlingunum, sokkunum og húfunum var dreift til barnanna í barnaþorpinu og í samfélagsþjónustumiðstöð SOS þar sem illa staddar barnafjölskyldur fá aðstoð. Ljóst er að margir munu hlýja sér í íslenska lopanum í vetur.
Nýlegar fréttir
Ingibjörg og Anna Bjarney kjörnar í stjórn SOS
Aðalfundur SOS Barnaþorpanna á Íslandi var haldinn mánudaginn 13. maí og urðu þá breytingar á stjórn samtakanna. Ingibjörg E. Garðarsdóttir og Anna Bjarney Sigurðardóttir voru kjörnar í stjórnina til ...
SOS eru einu samtökin eftir á Gaza sem taka að sér fylgdarlaus börn
Ástandið á Gaza er sérstaklega viðkvæmt núna og SOS Barnaþorpin eru einu hjálparsamtökin eftir á svæðinu sem taka að sér fylgdarlaus börn. Þessi frétt er uppfærð reglulega með nýjustu fréttum frá SOS ...