Á þriðja tug milljóna króna til SOS í Palestínu

SOS Barnaþorpin á Íslandi senda á næstu dögum tíu milljónir króna til SOS í Palestínu vegna neyðaraðgerða á Gaza. Rúmar átta milljónir króna hafa safnast í söfnun SOS á Íslandi sem hófst í febrúar og stendur enn yfir á sos.is. Þetta er í annað sinn sem SOS á Íslandi sendir tíu milljónir króna til neyðaraðgerða SOS í Palestínu eftir að átökin brutust út fyrir botni Miðjarðarhafs í október sl. Í fyrri söfnun söfnuðust tvær milljónir króna og er bilið brúað með greiðslum úr neyðarsjóði SOS.

SOS Barnaþorpin eru einu hjálparsamtökin eftir á Gaza sem taka að sér munaðarlaus og fylgdarlaus börn.

Stuðningur Íslendinga við SOS Barnaþorpin í Palestínu fer stigvaxandi og fleiri gerast nú mánaðarlegir styrktaraðilar, SOS-foreldrar fyrir börnin í barnaþorpunum tveimur í Palestínu. Framlög SOS-foreldra tryggja umönnun og framfærslu þeirra barna sem þar búa og þegar þetta er ritað nemur heildarupphæð þeirra famlaga tæpum 600 þúsund krónum á mánuði. Framlög Íslendinga til SOS Barnaþorpanna í Palestínu eru því farin að telja vel á þriðja tug milljóna króna síðan í október.

68 börn flutt frá Gaza

Til stórtíðinda dró í mars þegar 68 börn og 11 starfsmenn SOS barnaþorpsins í Rafah voru flutt á brott frá Gaza og komið á öruggari stað til Bethlehem á Vesturbakkanum þar sem hitt SOS barnaþorpið er í Palestínu. Börnin sem flutt voru á brott frá Gaza eru áfram á framfæri barnaþorpsins í Rafah svo stuðningur SOS-foreldra heldur áfram að skipta miklu máli. Starfsemi er áfram í barnaþorpinu á Rafah.

Þessi brottflutningur barnanna hefði ekki verið mögulegur án opinna samskiptaleiða við viðeigandi yfirvöld. „Velferð berskjaldaðra barna hefur alltaf verið forgangsatriði SOS Barnaþorpanna, óháð stjórnmálum og með hlutleysi að leiðarljósi,“ segir m.a. um brottflutninginn í yfirlýsingu Alþjóðasamtaka SOS Barnaþorpanna.