Börn og starfsfólk barnaþorpsins flutt á brott frá Gaza

Þessi frétt er uppfærð reglulega.

13. mars 2024: 68 börn og 11 starfsmenn SOS barnaþorpsins í Rafah á Gaza í Palestínu hafa verið flutt á brott úr barnaþorpinu. Þau eru komin á öruggari stað til Bethlehem á Vesturbakkanum þar sem hitt SOS barnaþorpið er í Palestínu. Börnin sem eru á aldrinum 2-14 ára komu þangað á mánudaginn 11. mars ásamt forráðafólki sínu úr barnaþorpinu í Rafah.

Börnunum og starfsfólkinu líður vel miðað við aðstæður og njóta þau áfram umönnunar og sálræns stuðnings SOS Barnaþorpanna í Palestínu. Sum barnanna urðu eftir í barnaþorpinu í Rafah þar sem samþykki fyrir brottflutningi var ekki veitt af ættingjum þeirra og löggiltu forráðafólki.

111 Íslendingar eru SOS-foreldrar barnanna í SOS barnaþorpinu í Rafah. Þá hafa þúsundir Íslendinga styrkt neyðarsöfnun fyrir SOS Barnaþorpin í Palestínu. Stuðningur þessara Íslendinga er sérstaklega mikilvægur á þessum erfiðu tímum.

SOS barnaþorpið í Rafah hýsir einnig og heldur áfram að taka inn börn sem hafa misst umönnun foreldra í yfirstandandi stríði. Barnaþorpið í Rafah hýsir einnig meira en 100 flóttamenn, þeirra á meðal eru fjölmörg börn.

„Þessi árangursríki brottflutningur gefur okkur smá von. En á sama tíma höfum við áfram áhyggjur af öllum börnum sem eru enn í hættu á Gaza,“ segir í tilkynningu frá alþjóðasamtökum SOS Barnaþorpanna.

12. febrúar 2024: Ástand­ið í SOS barna­þorp­inu í borg­inni Rafah í Palestínu verð­ur sí­fellt við­kvæm­ara og er nú ekki leng­ur tal­ið ör­uggt. Ísra­els­her hef­ur haf­ið árás­ir á borg­ina og und­ir­býr rým­ingaráætlan­ir fyr­ir al­menna borg­ara vegna yf­ir­vof­andi frek­ari árása. Þetta hef­ur bein áhrif á starf­sem­ina í SOS barna­þorp­inu í Rafah þar sem búa núna 76 börn og ung­menni auk starfs­fólks.

Sjá náner hér: SOS barnaþorpið í Rafah ekki lengur öruggt

76 börn og ungmenni í barnaþorpinu í Rafah

5. febrúar 2024: SOS barnaþorpið í Rafah tekur að sér fylgdarlaus börn og ungmenni sem misst hafa foreldra sína í stríðsátökunum. Í barnaþorpinu búa núna 76 börn og ungmenni. Öll börn og starfsfólk barnaþorpsins eru heil á húfi eins og er. Í barnaþorpinu fá börnin sálrænan stuðning daglega og starfsfólk sér til þess að umhverfi þeirra sé eins barnvænt og kostur er. „Eins og að taka reglulega þátt í skemmtilegum leikjum,“ segir starfsmaður í barnaþorpinu.

Börnin heyra stöðug sprengjuhljóð

„Börnin heyra stöðugt í sprengjum og skothvellum allan daginn. Þau eru áhyggjufull og óttast líf ættingja sinna og vina í samfélaginu. Börnin eru undir miklu álagi. Þau mega ekki yfirgefa barnaþorpið og því leggjum við mikið á okkur til að létta þeim lífið og sjá til þess að þau hafi nóg fyrir stafni.“

62 starfsmenn eru í barnaþorpinu í Rafah og margir þeirra hafa misst heimili sín. „Til að styðja við börnin réðum við sjö starfsmenn úr nærsamfélaginu í Rafah, auk félagsráðgjafa, sálfræðings og hjúkrunarfræðings," segir Ghada Hirzallah, framkvæmdastjóri SOS Barnaþorpanna í Palestínu.

19-25 þúsund börn hafa misst foreldra

Margt fólk kemur reglulega að barnaþorpinu í Rafah og biður um að tekið sé við börnum sem það getur ekki séð fyrir. Þetta er oft skyldfólk sem tók að sér börn látinna ættingja en getur ekki lengur framfleytt börnunum. Erfitt er að segja nákvæmlega til um hversu mörg börn hafa misst annað eða báða foreldra sína í stríðinu á Gaza en heimildir úr ýmsum áttum gefa til kynna að það séu á bilinu 19 til 25 þúsund börn.

Neyðarsöfnun fyrir SOS í Palestínu

SOS Barnaþorpin í Palestínu eru að hjálpa þessu fólki í neyðaraðgerðum sínum sem hófust í október. Fjöldi Íslendinga gaf framlög til neyðarsöfnunar vegna sameiginlegs hjálparstarfs SOS í Palestínu og Ísrael fyrst eftir að stríðið braust út. Síðan hefur neyðin margfaldast á Gaza og nú í vikunni settu SOS Barnaþorpin á Íslandi af stað neyðarsöfnun, eingöngu vegna aðgerða SOS á Gaza.

9. janúar 2024

SOS mæður á eftirlaunum snúa aftur til starfa

Þrátt fyrir að stríðsástand hafi varað á Gaza í þrjá mánuði heldur starfsemi SOS barnaþorpsins í Rafah áfram og börnin þar fá öllum grunnþörfum sínum mætt. Yfir 70 börn bjuggu í barnaþorpinu áður en stríðið braust út og nú bætast enn fleiri börn við sem misst hafa foreldra sína í stríðinu.

Eins og áður hefur verið greint frá hér neðar í þessari uppfærðu færslu hófu SOS Barnaþorpin samstarf við UNICEF, barnahjálp Sameinuðu þjóðanna. Samkomulag samtakanna felur í sér að SOS Barnaþorpin taka við umönnun alls 55 fylgdarlausra barna og eru fimm fyrstu börnin nú þegar flutt í barnaþorpið í Rafah.

„Við erum m.a. að fá til baka tvær reyndar SOS-mæður á eftirlaunum til þess að taka að sér umönnun barnanna sem nú bætast í hópinn auk fleira starfsfólks sem við þurfum í það nauðsynlega uppeldisstarf sem framundan er,“ segir talsmanneskja SOS Barnaþorpanna í Palestínu.

Þriggja ára stúlka í áfalli fannst fylgd­ar­laus

Fimm fylgdarlaus börn komu í barnaþorpið á síðustu dögum. Sum þeirra eru í alvarlegu áfalli og fá sálfræðiaðstoð. Meðal þeirra er þriggja ára stúlka sem fannst ráfandi um ein og fylgd­ar­laus við eft­ir­lits­stöð á Gaza.

Lestu sögu hennar hér.

21. desember 2023

SOS Barnaþorpin í Palestínu hafa undanfarið aðstoðað fjölda fólks í neyð á Gaza. Í fyrsta fasa neyðaraðgerða okkar á Gaza eftir að stríðið braust út í október náðum við til 220 barnafjölskyldna og yfir þúsund einstaklinga. Hjálparstarf SOS beindist fyrst að fátækum barnafjölskyldum en nú er framundan aukinn stuðningur við fleiri börn og fjölskyldur í samfélaginu.

Sjá einnig: Þetta erum við að gera á Gaza

8. desember 2023

SOS tekur að sér 55 fylgdarlaus börn á Gaza

SOS Barnaþorpin í Palestínu hafa gengið frá samkomulagi við UNICEF um að taka á móti 55 fylgdarlausum börnum sem hafa misst foreldra sína eða orðið viðskila við þá í stríðinu á Gaza-svæðinu. SOS í Palestínu sér um umönnun barnanna í bráðabirgðaathvarfi í SOS Barnaþorpinu Rafah í að hámarki eitt ár.

„Til að styðja við börnin munum við ráða sjö starfsmenn úr nærsamfélaginu í Rafah, auk félagsráðgjafa, sálfræðings og hjúkrunarfræðings. Við munum fá tvær reyndar SOS-mæður á eftirlaunum til að sinna börnunum ásamt nauðsynlegu uppeldisstarfi," segir Ghada Hirzallah, framkvæmdastjóri SOS Barnaþorpanna í Palestínu.

Svona er neyðaraðgerðum SOS Barnaþorpanna háttað

Yfir 17 þúsund börn á Gaza hafa misst foreldra

Flóknar og umfangsmiklar neyðaraðgerðir SOS Barnaþorpanna á svæðinu hafa verið í fullum gangi frá því stríðið braust út í byrjun október. Starfsfólk SOS á svæðinu lýsir gríðarlega erfiðum aðstæðum. Áætlað er að á bilinu 17.000 til 18.000 börn hafi misst annað eða báða foreldra sína í stríðinu á Gaza. Eftir standa börn án andlegs og fjárhagslegs stuðnings. Auk þess hafa yfir 450 þúsund börn misst heimili sín.

Ekkert mannfall hefur orðið í sjálfum SOS barnaþorpunum í Palestínu og Ísrael en tíu skjólstæðingar fjölskyldueflingar á Gaza eru látnir, þar af sex börn. Í Ísrael hafa fjórir skjólstæðingar fjölskyldueflingar látist, þar af þrjú börn.

Styrktu neyðaraðgerðir SOS

Börnin heil á húfi í barnaþorpinu í Rafah

(16. nóvember, 2023)
Þær upplýsingar sem við höfum frá SOS barnaþorpinu í Rafah er að börnin í barnaþorpinu eru öll heil á húfi. Það er vel hugsað um þau af SOS mæðrum og sálfræðingum sem eru að vinna mjög gott starf. Mikil áhersla er á að dreifa huga barnanna og koma í veg fyrir að þau verði hrædd.

„Ég reyni að vera yfirveguð eftir minni bestu getu. Við horfum á teiknimyndir og leikum við börnin. Við reynum að hugga þau svo að þau finni sem minnst fyrir því sem er að gerast - því það sem er í rauninni að gerast er óbærilegt fyrir huga barnanna," segir SOS móðoir í barnaþorpinu í Rafah.

Mannfall meðal skjólstæðinga SOS

Alþjóðasamtök SOS Barnaþorpanna fordæma harðlega árásir á borgaralega innviði og aðstöðu samtakanna á Gaza. Tvær íbúðir á Gaza sem SOS Barnaþorpin útveguðu fjölskyldum eyðilögðust í loftárásum. Áður hafði fjölskyldunum verið komið á öruggan stað og létust hvorki starfsfólk né skjólstæðingar SOS í árásinni.

SOS Barnaþorpin hafa misst og syrgja fjölmörg börn, ungmenni og foreldra í verkefnum á vegum samtakanna, bæði í Ísrael og Palestínu, sem látist hafa í yfirstandandi átökum.

(1. nóvember, 2023)

SOS á Íslandi sendir 10 milljónir króna

SOS Barnaþorpin á Íslandi hafa ákveðið að senda 10 milljónir króna í neyðaraðgerðir sem SOS í Palestínu og Ísrael standa sameiginlega að, beggja vegna landamæranna. Eðli neyðarinnar er vissulega ekki það sama í Ísrael og á Gaza og munu aðgerðir SOS taka mið af stöðunni hverju sinni. Almenningur á Íslandi getur lagt söfnuninni lið í neyðarsöfnun okkar hér á sos.is.

SOS Barnaþorpin hjálpa börnum sem orðið hafa viðskila við fjölskyldur sínar að sameinast á ný, sinna börnum sem misst hafa foreldra sína og huga sérstaklega að áfallahjálp og geðheilsu barnanna, sem upplifað hafa hræðilega hluti. Þetta gerum við án þess að taka pólitíska afstöðu. Við einfaldlega hjálpum þeim börnum sem við getum hjálpað og þurfa á hjálp að halda.

Þessi frétt er uppfærð reglulega og hér neðar má sjá yfirlit yfir það sem við vitum.

17. október 2023

Ákall um tafarlaust vopnahlé

Alþjóðasamtök SOS Barnaþorpanna birtu í dag yfirlýsingu og opinbert ákall um tafarlaust vopnahlé á Gaza.

„Hækkandi tala látinna og yfirvofandi mannúðarkrísa krefjast þess af öllum hlutaðeigandi aðilum að taka tafarlaust, skref í átt að því að vernda almenna borgara og ljúka þessu stríði. Ekkert réttlætir dráp, árásir og ofbeldi gegn almennum borgurum. SOS Barnaþorpin kalla eftir vopnahléi tafarlaust."

Sjá tilkynningu SOS Children´s Villages

Allir heilir á húfi í barnaþorpunum

SOS Barnaþorpin í Ísrael og Palestínu staðfestu 9. október að öll börn og ungmenni á framfæri samtakanna í barnaþorpunum eru heil á húfi. Blóðug stríðsátök hófust laugardaginn 7. október og hefur mannfall verið mikið.

Því miður lést barn í fjölskyldueflingu SOS í Palestínu og ungur piltur í verkefni þar á vegum SOS. Mánudaginn 16. október bárust svo þau sorgartíðindi að heil fjölskylda í fjölskyldueflingu SOS í Palestínu hafi látist í sprengjuárás á sunnudeginum 15. október.

Sjá einnig: Söfnun hafin fyrir SOS Barnaþorpin í Palestínu og Ísrael

Sjö manna fjöl­skylda dó í sprengju­árás - „Börn­in eru hrædd“

SOS styð­ur einnig fjöl­skyld­ur sem eiga um sárt að binda. „Þetta eru stuðn­ings­verk­efni/fjölskylduefling og það eru um 350 fjöl­skyld­ur sem þiggja þá að­stoð. 1.500 börn til­heyra þess­um fjöl­skyld­um. Marg­ar þeirra búa á Gaza­strönd­inni og nú þeg­ar höf­um við feng­ið fregn­ir af því að sjö manna fjöl­skylda dó í sprengju­árás, hjón og fimm börn.

Við höf­um líka feng­ið að vita af ann­arri fjöl­skyldu sem varð fyr­ir árás. Mamm­an er ekkja, hún er mik­ið slös­uð, elsti son­ur henn­ar sem var 22 ára er lát­inn og litlu systkini hans þrjú líka. Son­ur­inn var fyr­ir­vinna fjöl­skyld­unn­ar. Þetta er bara það sem við höf­um feng­ið stað­fest,“ seg­ir kon­an og bæt­ir við að mun fleiri séu dán­ir á Gaza en greint hef­ur ver­ið frá því að fjöldi fólks sé graf­ið und­ir rúst­um. „Ótt­ast er að það séu mjög mörg börn graf­in í rúst­um húsa,“ sagði starfskona SOS í Palestínu í við­tali við ís­lenska fréttamið­il­inn Heim­ild­ina. 

Sjá nánar hér

17 börn styrkt af Íslendingum

Íslenskir SOS-foreldrar styrkja átta börn í SOS barnaþorpum í Palestínu og níu börn í Ísrael. Börnin verða áfram á framfæri SOS Barnaþorpanna og því heldur stuðningur styrktaraðila áfram að skipta máli.

Alls eru 213 börn og ungmenni á framfæri SOS Barnaþorpanna í Ísrael í tveimur barnaþorpum, í Arad og Migdal Haemek. Þá er ungmennaheimili SOS í Tel Aviv. 193 börn og ungmenni eru á framfæri SOS í Palestínu í tveimur barnaþorpum, í Bethlehem og Rafha.

SOS Barnaþorpin hafa starfað í Palestínu síðan 1968 og í Ísrael síðan 1977 og búa samtökin því yfir áratuga langri reynslu á svæðinu. Ákveðið ferli fer í gang við slíkar aðstæður sem miðar að því að tryggja öryggi barnanna.

Barn í fjölskyldueflingu SOS lést

Auk barnanna í barnaþorpunum í Palestínu eru rúmlega 4.200 börn, ungmenni og foreldrar þeirra skjólstæðingar í fjölskyldueflingu SOS. Staðfest er að eitt barn úr fjölskyldueflingu SOS lét lífið og tvö eru á gjörgæslu. Þá lést þar einnig piltur sem var þátttakandi í atvinnueflingu SOS fyrir ung fólk.

Palestína

Mörg börn á framfæri SOS í Palestínu búa að staðaldri hjá kynforeldrum sínum með stuðningi SOS og hafa þau öll verið flutt í barnaþorpið í Rafah á Gaza-svæðinu. „Við erum í stöðugum samskiptum við fólkið okkar á Gaza og gerum ráðstafanir eftir þörfum,“ segir Ghada Hirzallah, starfandi framkvæmdastjóri SOS Barnaþorpanna í Palestínu.

Ísrael

Börnin í SOS Barnaþorpunum í Ísrael voru flest hver í hefðbundinni heimsókn til kynforeldra sinna þegar átökin brutust út og áttu að snúa aftur í barnaþorpin að kvöldi laugardagsins sem átökin brutust út. Yfirvöld óskuðu eftir því að börnin yrðu tímabundið áfram hjá kynforeldrum sínum. Öll börnin eru þó á framfæri og undir eftirliti SOS Barnaþorpanna. Önnur börn eru í umsjón SOS-mæðra sinna eða starfsfólks neyðarmiðstöðva SOS.

Við fylgjumst áfram með framvindu mála og bætum við upplýsingum hér í þessari færslu ef tilefni verður til.

Sjá einnig: Uppfærð fréttaumfjöllun RÚV